Яқин Шарқда геосиёсий вазият кескинлашган бир пайтда Ўзбекистон ташқи савдо юкларини узлуксиз етказишни таъминлаш учун шошилinch чоралар кўрмоқда. Транспорт вазири Илҳом Маҳкамов «Ўзбекистон 24» телеканалига берган интервьюсида бу мақсадда махсус штаб ташкил этилганини маълум қилди.
Президент Шавкат Мирзиёев 23 июн куни бўлиб ўтган йиғилишда ташқи савдо йўналишларини қайта кўриб чиқиш ва юкларни хавфсиз портларга йўналтириш зарурлигини таъкидлаган. Маҳкамовга кўра, ушбу ўзгаришлар юк ташиш харажатларини 30 фоизгача ошириши мумкин.
Вазирнинг сўзларига кўра, Ўзбекистоннинг халқаро юк ташувлари асосан тўққизта йўлак орқали амалга оширилади. Улар орасида Эрон орқали ўтадиган Жанубий коридор энг муҳимлардан бири бўлиб, мамлакат импорт ва экспортининг 60 фоизига яқини шу йўлакка тўғри келади. Аммо Яқин Шарқдаги зиддиятлар ушбу йўналишда жиддий муаммолар келтириб чиқариши мумкин.
Шу муносабат билан, президент топшириғига кўра, Транспорт вазирлиги ҳузурида ишчи гуруҳ тузилди. Бу гуруҳ 24 соатлик иш режимида юкларнинг чегараларда ёки портларда туриб қолишининг олдини олиш, сунъий нарх ошишларига йўл қўймаслик ва логистика муаммоларини тезкор ҳал этиш билан шуғулланади.
Штаб Транспорт вазирлиги биносида жойлашади. 24 июндан бошлаб 1167 қисқа рақами ва махсус Telegram боти орқали юк ташишдаги муаммолар ҳақида хабар бериш имкони яратилди. Шунингдек, логистика жараёнларини реал вақтда кузатиш учун ягона электрон платформа ишлаб чиқилмоқда.
Штаб таркибига Ташқи ишлар вазирлиги, Божхона қўмитаси, Инвестициялар ва ташқи савдо вазирлиги, Савдо-саноат палатаси ва AIRCUZ каби ташкилотлар вакиллари киритилган.
Илҳом Маҳкамовнинг таъкидлашича, агар Эрон орқали юк ташишда муаммолар юзага келса, Покистон портлари, Туркиядан ўтадиган Ўрта коридор ёки Грузия-Россия чегараси орқали Россия ва Қозоғистон йўналишларидан фойдаланиш имконияти мавжуд. Ҳар бир халқаро йўлак учун икки-учта муқобил йўналиш тайёрланмоқда.