Премер-министр Кеир Стармер бу қарорни дунёда хавфлар ошиб бораётгани ва тинчликка кафолат қолмагани билан изоҳлади. Британия бу харид орқали 1998 йилдан буён илк бор ядро қуролини ҳаводан олиб юриш салоҳиятини қайта тиклайди.
Самолётларни харид қилиш НАТО таркибида тактик ядро қуролларини олиб юрувчи қўшинлар имкониятини кенгайтиришга ёрдам беради. НАТО Бош котиби Марк Рютте бу Британиянинг альянсга қўшаётган навбатдаги муҳим ҳиссаси эканини қайд этди.
Айни пайтда Британия ядро тийилиш сиёсати фақат Трайдент сув ости кемалари орқали амалга оширилар эди. Бироқ ушбу тизим сўнгги синовларда икки бор муваффақиятсизликка учради.
Британия бу қарор орқали Франция ва АҚШ каби ҳаво, сув ва ерда ядро салоҳиятига эга бўлган НАТО иттифоқчилари билан янада яқинроқ ҳамкорлик қилади. АҚШ бу турдаги самолётлар учун B61 тактик ядро бомбаларини етказиб бериш имконини кўриб чиқади. Британия ўз самолётларида шу турдаги қуролларни фойдаланиши учун АҚШ ёрдами зарур бўлади.
Маълумотларга кўра, АҚШ 2008 йилда Британиядан сўнгги ядро қуролларини олиб чиқиб кетган эди. Британия бу янги дастур орқали мамлакатда тахминан 20 минг иш ўрнини сақлаб қолади ва НАТОга содиқлигини яна бир бор намоён этади.
Ҳукумат 2035 йилгача мудофаа харажатларини ялпи ички маҳсулотнинг 5 фоизига етказиш ниятида эканини билдириб, мамлакатда қайтадан можароларга тайёргарлик кўриш зарурлигини қайд этди.