Қозоғистонда Chevrolet брендига тегишли автомобиллар нархи кескин тушди. Бу ҳақда Kursiv Kazakhstan нашри хабар берди. Нархлардаги ўзгаришларга мижозлар томонидан эътибор қаратилганидан сўнг, расмий дистрибютор ҳам маълумотни тасдиқлаган.
Хусусан, Chevrolet Cobalt’нинг Optimum AT комплектациясидаги нархи 8,2 млн тенгедан (197 млн сўм) 7,3 млн тенгега (175 млн сўм) тушган. Onix’нинг механик узатмалар қутисига эга базавий модели 7 млн тенгега (168 млн сўм) туширилган.
Шу билан бирга, Tracker кроссоверининг бошланғич нархи 10 миллион тенге (240 миллион сўм) атрофида белгиланган.
Chevrolet’нинг Қозоғистондаги расмий вакиллари бу ўзгаришни компаниянинг нарх сиёсатини доимий равишда қайта кўздан кечириш жараёни деб атади. Улар бундай қадам мижозларга юқори сифатли автомобилларни рақобатбардош нархларда таклиф қилишга қаратилганини таъкидлади.
«Бу ўзгаришлар мижозларимиз учун Chevrolet автомобилларини янада қулай ва арзон қилишга қаратилган», — дейилади расмий баёнотда. Шунингдек, улар брендга бўлган ишончни сақлаш ва бозорда мустаҳкам ўрин эгаллаш муҳимлигини қайд этган.