The Telegraph нашрининг ёзишича, НАТОга аъзо бўлган ва Россия ҳамда Беларус билан чегарада жойлашган беш давлат — Финландия, Эстония, Латвия, Литва ва Полша — Оттава конвенциясидан чиқиб, пиёдаларга қарши миналардан фойдаланишга тайёргарлик кўрмоқда. Бунинг мақсади — Россия армиясининг эҳтимолий ҳужумига қарши чегараларни мустаҳкамлашдир.
Янги «темир парда» Финландия шимолидаги Лапландиядан бошлаб, Полшанинг Лублин воеводасигача бўлган 3440 кмлик чегара бўйлаб чўзилиши кутилмоқда.
Пиёдаларга қарши миналарни тақиқлаш ҳаракатининг фаол курашчиси малика Диана эди. унинг ташаббуси билан 1997 йилда Буюк Британия ҳам бу кампанияга қўшилган ва Оттава конвенцияси айни пайтда Европанинг кўпгина давлатлари томонидан қўллаб-қувватланган. Энди бу беш давлат бу конвенциядан чекинмоқчи.
Россия эса бу каби халқаро шартномаларни ҳеч қачон қабул қилмаган. Landmine Monitor’нинг 2024 йилги ҳисоботига кўра, Россия сўнгги йилларда 26 миллиондан ортиқ пиёдаларга қарши миналар захира қилган ва уларни Украинада фаол ишлатмоқда. Таққослаш учун: иккинчи ўринда турган Покистонда 6 млн, Хитойда эса 5 млн мина мавжуд.
Литва мудофаа вазири Довиле Шакалененинг таъкидлашича, 2003 йилда Оттава конвенциясига қўшилганидан бери мамлакат хавфсизлиги радикал ёмонлашган.
Литва мина ишлаб чиқариш учун 800 млн евро ажратган ва ҳозирда мудофаа харажатларини ЯИМнинг 5,5 фоизигача кўтаришни режалаштирмоқда. НАТО ҳарбий режачилари эса Россия Болтиқбўйи мамлакатларига ҳужум қилиш учун Литва орқали Калининградга борадиган поезд йўлини баҳона қилиши мумкинлигини баҳолашмоқда.