2025 йил бошидан бери Россияда бензин нархлари 25 фоизгача ошиб кетди. Шунинг ортидан мамлакат Федерал монополияга қарши хизмати (ФАС) бу масалани қайтадан кўтариб, РФ бош вазири ўринбосари Александр Новакка таклифлар тайёрламоқда. Бу ҳақда «Интерфакс» ва Reuters манбалари маълум қилган.
Санкт-Петербург товар хомашё биржасида АИ-95 маркали бензин нархи июн ойидан бери 11 фоизга ошиб, 24 июн куни 1 тоннаси учун 67 минг 456 рублга етди. АИ-92 эса 12 фоизга қимматлашиб, 64 минг 462 рубл билан сўнгги бир йилдаги энг юқори кўрсаткични янгилади. Бу кўрсаткичлар 2023 йил кузидаги бензин инқирозини эслатади.
Ҳозирча Россияда трейдерлар ва воситачилар учун экспорт тақиқланган, лекин янги тартибларга кўра ишлаб чиқарувчилар ҳам экспорт ҳуқуқидан маҳрум бўлиши мумкин. Бу қарор «Газпром» ва «Роснефть» каби йирик компанияларга ҳам тааллуқли бўлади.
Таҳлилчиларнинг айтишича, нарх ошиши бензин ишлаб чиқарувчи корхоналардаги таъмир ишлари сабаб етказиб бериш ҳажмининг камайишига боғлиқ. Масалан, Астрахан ва Сургутдаги заводлар вақтинча тўхтаб турган, июлда эса Куйбишев нефт заводида таъмир режалаштирилган. Шу сабабли, бир томондан бензин таклифида пасайиш кузатилмоқда, иккинчи томондан эса завод эгалари ўз АЁҚШ тармоқларини таъминлаш учун биржадан фаол равишда сотиб олишга мажбур бўлмоқда.
Россия ҳукумати 2024 йил мартдан бошлаб бензин экспортига чеклов жорий қилган эди. Бу қоидалар ЕОИИ давлатларига экспорт, шахсий фойдаланиш ва ҳуманитар ёрдам учун амал қилмайди. 2024 йил декабрдан эса экспорт фақат ишлаб чиқарувчиларга рухсат этилди.
Шу йилнинг январ–май ойларида Россия бензин экспорти 25 фоизга ошиб, 2,51 млн тоннани ташкил этган.