АҚШ президенти Доналд Трамп 25 июн куни қилган баёнотида Украинадаги урушни 24 соат ичида тўхтатиш ҳақида айтган сўзлари жиддий эмас, балки сатира тарзида айтилиб, умумий сиёсий контекстни танқид қилишга қаратилганини маълум қилди.
«Албатта, бу сўзларим ҳазил, сатира эди. Бу — дунёдаги энг мураккаб уруш. Бу ишни бир кунда ҳал этиш ҳақида гапириш — мураккаб воқеликни камситиш бўлар эди», — деди Трамп.
У шунингдек, Россия президенти Владимир Путин ҳақида фикр билдириб, уни «жуда мураккаб инсон» деб атади. Зеленский билан ҳам ўзаро келишмовчиликлар бўлганини тан олди.
«Бу жуда мураккаб уруш. Бу ерда барча томонлар ўз манфаатлари учун ҳаракат қилмоқда ва вазият жуда чуқур илдизларга эга», — деб қўшимча қилди Трамп.
Трампнинг аввалги баёнотлари жаҳон оммавий ахборот воситалари ва сиёсий таҳлилчилар орасида қизғин муҳокамаларга сабаб бўлганди. У урушни зудлик билан тўхтатиш мумкинлигини даъво қилган эди. Энди эса у сўзларини юмшоқ услубда рад этди.