Ўзбекистон мобил интернет тезлиги бўйича дунё рейтингида 71-ўринни эгаллади
Мамлакат 2025 йил май ойида бир поғона юқори кўтарилиб, мобил интернет тезлигини 55,34 Мбит/с даражада таъминлади.
Ўзбекистон Speedtest Global Index’нинг 2025 йил май ойи учун тузилган ҳисоботида мобил интернет тезлиги бўйича 71-ўринни эгаллади. Бу кўрсаткич апрель ойига нисбатан бир поғона яхшиланганини англатади.
Ҳисоботга кўра, Ўзбекистондаги ўртача мобил интернет тезлиги 55,34 Мбит/с ни ташкил этди. Бу кўрсаткич сўнгги ойларда мобил алоқа инфратузилмасини яхшилаш, янги технологияларни жорий этиш билан боғлиқ. Шунингдек, операторлар ўртасидаги рақобат ва фойдаланувчилар сони ортиши ҳам тезлик ўсишига туртки берган.
Симли интернет тезлиги бўйича Ўзбекистон 72-ўринга кўтарилди. Бу кўрсаткич бир ой аввалги 76-ўринга нисбатан тўрт поғона юқори. Ўртача тезлик 87,23 Мбит/с этиб баҳоланди.
Жаҳон рейтингида эса БАА мобил интернет тезлиги бўйича 539,84 Мбит/с кўрсаткич билан етакчилик қилмоқда. Симли интернет тезлиги бўйича Сингапур 372,02 Мбит/с кўрсаткич билан биринчи ўринни эгаллаган.
Speedtest Global Index ҳар ойда дунё бўйича интернет тезлиги бўйича мамлакатларнинг кўрсаткичларини баҳолайди. Рейтингдаги ўсиш мамлакатда рақамли инфратузилма ривожланаётганидан дарак беради.