«Marinelog» нашри маълумотига кўра, кема 23 июн куни Аляска соҳилларидан тахминан 770 км узоқликда, 5 минг метр чуқурликда сувга ғарқ бўлган. Ҳодисага кема саҳнидаги ёнғин ва унинг ортидан келиб чиққан талафотлар, шунингдек, ноқулай об-ҳаво сабаб бўлгани айтилади.
Кемани бошқарувчи Zodiac Maritime компаниясига кўра, саҳнида 3048 та автомобиль бўлиб, уларнинг 70 таси электромобил, 681 таси ҳибрид модел ҳисобланади. Кемадаги 22 нафар экипаж аъзоси соғ-саломат қутқарилган.
Ёнғин айнан қайси транспорт воситасидан бошлангани ҳозирча аниқ эмас. Манбаларга кўра, юклар орасида Chery, Great Wall ва Buick Envision маркали автомобиллар ҳам бўлган. Кема Хитойнинг Янтай портидан чиқиб, Мексикадаги расмий Buick бозори томон йўл олган.
Маълумотларга кўра, кема SAIC корпорациясининг логистика бўлими ҳисобланган Anji Logistics томонидан ижарага олинган бўлиши мумкин.