Fitch халқаро рейтинг агентлиги 2025 йил июн ойида Ўзбекистоннинг чет эл валютасидаги суверен кредит рейтингини «BB-»дан «BB» даражага кўтарди. Агентлик бу қарорни мамлакатда олиб борилаётган иқтисодий ва институционал ислоҳотлар билан изоҳлади. Жумладан, пул-кредит сиёсатидаги қатъийлик, хусусийлаштириш жараёни ва давлат бошқарувида шаффофликни оширишга доир чоралар юқори баҳоланди.
2024 йилда энергия тарифларини эркинлаштириш ва субсидияларни қисқартириш орқали давлат бюджети кутилаётганидан яхшироқ натижа кўрсатган. Fitch қайд этишича, ушбу сиёсат бюджетнинг барқарорлигини таъминлашда муҳим аҳамият касб этди. Жумладан, давлат бюджети дефицити ЯИМнинг 3 фоиз даражасида бўлиб, режалаштирилган 4 фоиздан камроқ бўлган.
Шу билан бирга, давлат қарзи даражаси 32 фоиз атрофида экани, валюта захиралари эса 2025 йил 1 июн ҳолатига кўра 49,7 млрд долларга етгани, Ўзбекистоннинг ташқи молиявий барқарорлигини таъминлаётгани қайд этилган. Бу захиралар жорий ташқи тўловларни 10 ойга қоплай олади — бу BB рейтинг гуруҳидаги давлатлар ўртачасидан икки баробар юқори.
Fitch’нинг таъкидлашича, давлат корхоналари ислоҳоти, хусусийлаштириш жараёнлари ва макроиқтисодий ислоҳотлар изчиллик билан амалга оширилмоқда. Шунингдек, инфляцияни пасайтиришда Марказий банкнинг қатъий сиёсати ижобий натижа бераётгани қайд этилган — 2026 йилда инфляция 7 фоиз атрофида бўлиши кутилмоқда.
Шу билан бирга, Fitch ҳали ҳам йирик хатарлар мавжудлигини эслатади: жумладан, Россияга юқори иқтисодий боғлиқлик (экспорт ва пул ўтказмаларнинг катта қисми), экспортнинг товарларга қарамлиги ва молиявий долларлашув даражаси.
Бу рейтинг ўзгариши Ўзбекистоннинг халқаро қарз бозоридаги мавқеини мустаҳкамлаб, келгусида инвестиция оқимларига ижобий таъсир кўрсатиши мумкин.