Россиялик журналист Анастасия Кашеварованинг маълумотларига кўра, операция давомида жангчилар 15,7 км масофадаги газ қувурида ҳаракатланишган ва 6 кун давомида шу қувурда яшашган. Ушбу мураккаб ва хавфли вазифа давомида улар душман орқасида жойлашиб, ўз бурчларини бажаришган. Бироқ, операциядан кейин жангчиларнинг аксариятида ўпка шикастланишлари кузатилган. Уларга Курск шифохоналарида «ўртача оғир бронхит» ташҳиси қўйилган.
Анастасия Кашеварованинг ёзишича, мазкур ташхис ёлғон бўлиб, аскарларда ўпка саратони ривожланган. Баъзиларга 100 минг рубллик компенсация тўланган, бироқ бу тўловлар жиддий касалликларнинг сабабларини ҳисобга олмаган. Баъзи жангчиларнинг соғлиғи рак ёки тромбоэмболия каби оғир ҳолатларгача етиб борган.
Қайд этилишича, жангчиларнинг касалликлари расмий равишда жангда олинган шикаст ёки оғир жароҳат сифатида тан олинмаган. Шу сабаб улар қонунчилик бўйича компенсация ва мукофот олиш ҳуқуқидан маҳрум қилинган.
Умуман олганда, операцияда қатнашган 11-бригада, «Ветеран», «Ахмат», ДШРБ «Восток», 30-полк ва 106-бригада жангчилари на мукофотланган ва на рағбатлантирилган. Генштаб уларни мукофотлашга арзимайди, деган қарор қабул қилган. Масала рус жамоатчилигида кескин норозилик уйғотган. Жангчилар бу операцияда ҳаётлари ва соғлиғини қурбон қилган бўлса-да, расмийлар уларнинг хизматини инкор этмоқда. Мурожаатда Генштабга қайта кўриб чиқиш ва ушбу қарорни адолатли ҳал этиш сўралган.