Минскдаги Евроосиё иқтисодий форумида сўзга чиққан Путин Россия ялпи ички маҳсулоти ўтган йили 4,3 фоизга ўсганини, евро ҳудудида эса бу кўрсаткич фақат 0,9 фоизни ташкил этганини эслатди. Шу билан бирга, 2025 йил бошидан Россияда иқтисодий ўсиш тўрт баравар пасайиб, биринчи чоракда 1,4 фоизни ташкил этди.
Путин буни иқтисодиётда инфляцияни тўхтатиш учун режалаштирилган чора деб баҳолади. Унинг айтишича, инфляциянинг ортиши армия учун ажратилган 13,5 трлн рубл ёки ялпи ички маҳсулотнинг 6 фоизидан ортиғи миқдоридаги харажатлар ортидан юз берди.
Путин Ғарбнинг Россия нефтига нарх чегарасини тушириш ва янги санкцияларни жорий этиш режалари уларнинг ўзига зарар келтиришини таъкидлади. У нефт ва газ нархлари ўзгарувчанлигини қайд этиб, Яқин Шарқда янги можаро юзага келса, энергетика бозорида нархлар янада кескин кўтарилиши мумкинлигини билдирди.
Путин авваллари ҳам Ғарб иқтисодиёти ҳалокатга юз тутишини башорат қилган. У АҚШни жаҳон иқтисодиётидан доллар резерв валютаси мақоми ва катта давлат қарзи орқали фойдаланишда айблаб келади. Путин 2019 йилда АҚШ санкциялари долларга ишончни йўқотиши орқали уни йиқитишини айтган эди. 2021 йилда эса Америка учун СССРнинг тақдирини башорат қилган, кейинги йилларда эса долларнинг аҳамияти пасайиб бораётганини таъкидлаган. Лекин унинг тахминлари ўнгидан келганича йўқ.