Россия президенти Владимир Путин АҚШ раҳбари Доналд Трамп ҳақида фикр билдириб, уни «жасур» деб атади. У Трампни оғир ва хавфли сиёсий йўлни босиб ўтиб, яна ҳокимиятга қайтгани учун ҳурмат қилишини билдирди.
Путин, шунингдек, Россия ва АҚШ президентлари ўртасида учрашув ўтказилиши мумкинлигини айтди. Унга кўра, бу ташаббусни Россия томони мамнуният билан қўллаб-қувватлашга тайёр.
Украинадаги уруш юзасидан Трамп томонидан билдирилган фикрларга тўхталар экан, Путин унинг уринишлари самимий эканини таъкидлади. Унинг фикрича, муаммога бевосита аралашгандан сўнг Трамп вазиятнинг мураккаблигини англаб етган.
Россия раҳбарига кўра, АҚШ билан муносабатлар Трампнинг иштироки туфайли аста-секин барқарорлашмоқда. У дипломатик алоқалар тўлиқ тикланмаганини, аммо биринчи қадамлар ташланганини қайд этди.
Путин Россия Федерацияси ва АҚШ иқтисодий ҳамкорликда яхши истиқболларга эга эканлигини, Америка бизнеси Россия бозорига қайтишга интилаётганини таъкидлади. «Иқтисодий ҳамкорлик соҳасида жуда яхши истиқболга эгамиз. Билишимизча, Америка бизнеси бозоримизга қайтиш истагини англатувчи сигналлар юбормоқда. Биз буни, албатта, мамнуният билан кутиб оламиз», дея қўшимча қилди у.