27 июн куни АҚШ Сенати Трамп маъмуриятининг Эронга қарши ҳарбий ҳаракатларини чеклаш бўйича қонун лойиҳасини рад этди. Овоз беришда 53 нафар сенатор қонунга қарши, 47 нафар эса қўллаб-қувватлаш учун овоз берди. Овоз бериш асосан партиявий чизиқлар бўйича бўлди. Пенсилвания демократи Жон Феттерман қонунга қарши овоз берган бўлса, Кентуккилик республикачи Рэнд Пол уни қўллаб-қувватлади.
Қонун лойиҳаси муаллифи, сенатор Тим Кейн конгресснинг уруш эълон қилиш ваколати фақат Конгресска тегишли эканини таъкидлади. Унинг фикрича, Эронга қарши ҳар қандай ҳарбий ҳаракат Конгресс томонидан махсус тасдиқланиши шарт.
Трамп маъмурияти Эроннинг юқори даражада бойитилган уран захиралари ва сўнгги бомбардимонлар натижалари бўйича Сенат ва Ваколатлар палатасига ёпиқ маълумот тақдим этди. Бироқ кўплаб демократик сенаторлар бу маълумотлар уларни қониқтирмаганини билдиришди. Улар Трамп эълон қилган «Эрон ядровий объектлари йўқ қилинди» деган баёнотларга шубҳа билан қарашмоқда.
Қарши томон вакиллари Трампнинг Эрондаги ҳужуми чегараланган ва президентнинг қўмондон сифатидаги ваколати доирасида бўлганини айтди. Сенатор Билл Ҳагерти фикрича, бу каби чекловлар ҳар қандай президентнинг миллий хавфсизлик бўйича тезкор қарор қабул қилиш имкониятини чеклаб қўяди.
Трамп ҳужумдан кейин Эроннинг ядровий инфратузилмасига етказилган зарар катта бўлганини таъкидлади. Эрон эса ўз ядровий дастурини фақат тинч мақсадда амалга ошираётганини билдирмоқда.
Сенатор Тим Кейн 2020 йилда ҳам шунга ўхшаш резолюцияни таклиф қилган ва ўша пайтда Конгресс икки палатасидан ўтган, аммо президент вето қилган эди. Бу галги резолюция ҳам Сенатда рад этилди ва Ваколатлар палатасида муҳокама қилинмади.