Фармонда белгиланишича, ойлик маошларни ошириш билан боғлиқ барча харажатлар давлат томонидан қоплаб берилади. Бу орқали маҳаллий ҳокимият тизимида ишловчи ходимларнинг моддий рағбатлантирилиши кўзда тутилган.
Иқтисод ва молия тизимида яна бир қатор янгиликлар жорий этилади. Хусусан, рақамлаштириш, «яшил» технологиялар, энергия самарадорлиги ва тиббий суғурта тизимини такомиллаштириш мақсадида 92 та янги штат бирлиги ташкил қилинади. Шунингдек, сунъий интеллектуал технологияларга ихтисослашган лойиҳа офислари ташкил этилади. Бу тузилмалар Ғазначилик ва Пенсия жамғармаси таркибида фаолият олиб боради.
Ғазначилик қўмитаси раҳбариятида ҳам янги ўзгаришлар бўлади. Жумладан, рақамли трансформация бўйича раис ўринбосари лавозими жорий этилади. Бу рақамлаштириш жараёнларини янада тезлаштиришга хизмат қилади.
Шунингдек, Пенсия жамғармаси ва Ғазначилик қўмитасининг марказий аппарати ходимлари учун ҳам муҳим янгилик — уларнинг ойлик маошлари Иқтисодиёт ва молия вазирлиги ходимлари ойликлари билан тенглаштирилади.
Бу ислоҳотлар ходимлар меҳнатини муносиб баҳолаш, тизим самарадорлигини ошириш ва рақамлаштириш жараёнларини чуқурлаштиришга хизмат қилади.