«Forbes» журнали Global Entrepreneurship Monitor маълумотларига таяниб, дунёда 658 миллион аёл турли компанияларга асос солган ёки уларни бошқариб келаётганини маълум қилди. Эркаклар орасида эса бу кўрсаткич 722 миллион кишини ташкил қилади.
Аёл тадбиркорларнинг ютуқларини эътироф этиш мақсадида «Forbes» журнали илк бор ўз бойлигини мустақил орттирган дунёдаги энг бой 50 нафар аёл рейтингини эълон қилди. Ушбу рўйхатга 13 мамлакат ва 4 қитъадан аёллар киритилган. Уларнинг умумий бойлиги 276 млрд долларга тенг бўлиб, ўртача ҳар бири 5,5 млрд долларга эга.
Рейтингда биринчи ўринни швейцариялик Рафаэла Апонте-Диамант эгаллади. Унинг бойлиги 38,8 млрд долларга тенг. У ва турмуш ўртоғи Жанлуижи Апонте Mediterranean Shipping Company (MSC) компаниясига асос солган бўлиб, MSC бугунги кунда дунёдаги энг йирик юк ташувчи компаниядир. Рафаэла 80 ёшида ҳам компания фаолиятида фаол иштирок этмоқда.
Иккинчи ўрин америкалик Дайан Ҳендриксга насиб этди. Унинг бойлиги 22,3 млрд доллар бўлиб, у ABC Supply компаниясининг ҳаммуассиси. Бу компания АҚШда қурилиш материаллари етказиб бериш бўйича етакчилардан бири ҳисобланади.
Учинчи ўрин хитойлик Чжун Хуэйцзяньга тегишли. У Hansoh Pharmaceuticals компаниясига асос солган ва унинг бойлиги 15,6 млрд долларни ташкил этади. Компания онкологик ва инфекцион касалликларни даволашга ихтисослашган.
Тўртинчи ўринда яна хитойлик тадбиркор Чжоу Цюньфэй жой олган. У сенсорли экранлар ишлаб чиқарувчи Lens Technology компаниясига асос солган ва унинг бойлиги 10 млрд долларга етган. Компания Apple, Samsung ва Tesla каби йирик мижозларга хизмат кўрсатади.
Рўйхатда шунингдек, Буюк Британиядан Дениз Коутс, АҚШдан Жуди Фолкнер, Канададан Лин Тан, Гонконгдан Ван Лайчунь, АҚШдан Мариан Илич ва Линда Ресник каби тадбиркор аёллар ҳам мавжуд.