«UzAuto Motors» акциядорлик жамияти ёнғиндан хабар бериш ва сигнализация тизимига техник хизмат кўрсатиш бўйича бошланғич қиймати 450,2 миллион сўм бўлган тендер эълон қилди. Электрон тендер платформасидаги маълумотларга кўра, ушбу танловда икки талабгор иштирок этган.
Тендер натижаларига кўра, энг паст нарх — 436,8 миллион сўм таклиф этган «MONTAJSPETCSTROY» хусусий корхонаси ғолиб деб топилган. Иккинчи иштирокчи — «MAXSUS TEXNO SANOAT» МЧЖ эса захира ғолиби бўлган.
Очиқ манбаларда келтирилишича, «MONTAJSPETCSTROY» ХК Тошкент шаҳри, Яккасарой тумани, Шохжаҳон кўчаси, 12А-уйда жойлашган. Қизиғи шундаки, «MAXSUS TEXNO SANOAT» МЧЖ лицензиясида ҳам айнан шу манзил унинг расмий почта манзили сифатида кўрсатилган.
Бу ҳолат танловда иштирок этган икки ширкат ўртасида алоқадорлик бўлиши эҳтимоли ҳақида саволларни пайдо қилди. Бир хил манзилдан рўйхатдан ўтган иштирокчилар тендер шаффофлиги юзасидан баҳсларга сабаб бўлиши мумкин.
Ҳозирча мазкур ҳолат бўйича расмий изоҳ берилмаган.