Россиянинг бой ва элита қатлами фарзандлари учун хитой тилида сўзлашувчи enaga ёллашга катта қизиқиш билдирмоқда. The New York Times нашри ёзишича, бу хизматларга бўлган талаб сўнгги йилларда сезиларли даражада ошган.
«English Nanny» компанияси асосчиси Валентин Гоголнинг таъкидлашича, бугун хитойлик энагаларга бўлган талаб француз тилидаги энагалардан ҳам ошган ва бу борада инглиз тилидан кейин иккинчи ўринни эгаллаган. Компания бу талабни қондириш учун барча имкониятларни ишга солмоқда.
Маълумотларга кўра, хитойлик энагаларнинг ойлик иш ҳақи 5000 долларгача етиши мумкин. «English Nanny» мижозлари орасида хитой тили эндиликда инглиз тилидан кейин энг муҳим хорижий тил сифатида танланмоқда.
The New York Times ёзишича, бу Россияда кузатилаётган «хитойлашув» жараёнининг бир қисми ҳисобланади. Россиялик талабалар ва мактаб ўқувчилари орасида ҳам хитой тилига қизиқиш кескин ошган, шунингдек, хитой маданияти ва маҳсулотларига ҳурмат ҳам ортиб бормоқда.
Яқин вақтгача Ғарб маданиятига таяниб келган Россияда ҳозирда хитой тилини билиш ва хитой маданиятига яқинлашиш модага айланган. Бу ўзгариш Россиянинг Украинага қарши уруши ва Хитой билан сиёсий яқинлашуви фонида содир бўлди.
Россия президенти Владимир Путин ҳам бу борада фикр билдирган. У ўзининг набираси хитой тилида бемалол сўзлаша олишини ва унинг тарбиячиси хитойлик эканини маълум қилган.