Эронга алоқадор деб ҳисобланаётган ҳакерлар АҚШ собиқ президенти Доналд Трампга яқин шахсларнинг электрон хатлари ва шахсий маълумотларини ошкор этиш билан таҳдид қилмоқда. Бу ҳақда «Рейтер» агентлиги хабар берди.
Маълумотларга кўра, хакерлар Оқ уй аппарати раҳбари Сюзан Уайлс, Трампнинг адвокати Линдси Ҳаллиган, маслаҳатчиси Рожер Стоун ва актриса Сторми Дэниелснинг шахсий аккаунтларини бузган. Улар 100 гигабайтга яқин электрон хатлар ва мактубларни ўғирлаб, интернетда чоп этиш ниятида эканини маълум қилган.
Ҳакерлар келгусида яна кўпроқ маълумотларни ошкор этиш мумкинлигини айтган, бироқ ҳозирча қандай маълумотлар борлиги ҳақида тафсилот бермаган. Агентлик хабарига кўра, ушбу материаллар сотилиши мумкинлиги ҳам билдирилган.
Май ойида «Wall Street Journal» манбаларга таяниб, Оқ уйдан маълумот сиздирилгани ҳақида ёзганди. Бу галги ҳакерлик ҳужумида Сюзан Уайлснинг шахсий аккаунтлари орқали Конгресс аъзолари ва йирик корпорация раҳбарлари билан алоқага чиқилгани маълум қилинган.
Айни пайтда ҳакерлар аввал ҳам Трампнинг сайлов кампаниясида иштирок этган шахсларга кибер ҳужумлар уюштирган. Жумладан, ўтган йили Эрон агентлари вице-президент Жей Ди Вэнснинг электрон манзилини бузгани маълум қилинган.