«Al Jazeera» нашри маълум қилишича, Ғазо секторида сўнгги 48 соат ичида Исроил ҳарбийларининг амалга оширган амалиётлари натижасида 300 дан ортиқ фаластинлик ҳалок бўлган. Улар орасида Ғазо гуманитар жамғармасига мурожаат қилган 33 нафар тинч фуқаро ҳам бор. Гувоҳларнинг айтишича, одамлар олдиндан огоҳлантирилмасдан «асоссиз отиб ташланган».
Ғазо расмийларининг маълумотига кўра, бу давр мобайнида Исроил қўшинлари 26 та «қонли ҳужум» амалга оширган. Ҳудуддаги фавқулодда хизматлар ва шифокорлар отишмалар шиддати туфайли жабрланганларга ёрдам кўрсата олмаган.
Ҳозирда ҲАМАС ҳаракати Ғазода вақтинча ўт очишни тўхтатиш бўйича янги таклифларни кўриб чиқмоқда. АҚШ президенти Доналд Трамп Исроил 60 кунлик сульҳга рози бўлганини маълум қилган эди.
БМТ ва инсон ҳуқуқлари ташкилотлари вазиятни ўрганишда давом этмоқда. Associated Press агентлигининг суриштирувига кўра, гуманитар жамғарма тармоқларини қўриқлаётган Америка компаниялари ходимлари хавф мавжуд бўлмаган ҳолатларда ҳам фаластинликларга нисбатан оғир куч ишлатгани аниқланган. Улар отишма, граната ва қалампирли аэрозоллардан фойдаланган.
«Haaretz» газетаси эса Исроил армияси аскарлари билан ўтказган сўров натижасида, уларга қуролсиз одамларга, гуманитар ёрдам кутиб турган пайтда, отиш буйруғи берилганини ёзган.
Охирги маълумотларга кўра, 2023 йил 7 октябридан буён давом этаётган можаро оқибатида Ғазода 57 мингдан ортиқ одам ҳалок бўлган, 134 мингдан кўпроғи жароҳатланган. Шу пайтгача Исроилда ҳам мингдан зиёд шахс ҳалок бўлган ва юзлаб фуқаролар асирга олинган.