4 июл куни Қорабоғнинг Хонкенди шаҳрида бўлиб ўтган Иқтисодий ҳамкорлик ташкилоти (ИҲТ) саммитида Туркия президенти Ражаб Тоййиб Эрдоған нутқ сўзлади. У ўз чиқишида ушбу анжуманнинг Озарбойжон томонидан озод қилинган ҳудудда ўтказилиши тарихий аҳамиятга эга эканини таъкидлади.
Эрдоған нутқида бир қатор глобал ва минтақавий масалаларга тўхталди. Хусусан, у Исроилни Ғазодаги ҳарбий ҳаракатлари учун кескин танқид қилди. Унинг сўзларига кўра, «Нетаняҳу ҳукумати минтақани қонли кўлга айлантирмоқда ва Туркия бундай золимликка томошабин бўлиб тура олмайди». Эрдоған, шунингдек, мамлакатининг Фаластин масаласидаги қатъий позицияси ўзгармаслигини таъкидлади.
Шунингдек, Эрдоған ИҲТ доирасида Шимолий Кипр Турк Республикаси билан спорт, иқтисод, туризм ва маданият соҳаларида ҳамкорликни кенгайтиришни таклиф қилди.
Туркия раҳбари, сўзининг якунида, Суриядаги янги ҳокимият билан муносабатларни тиклаш зарурлигини ҳам эслатиб ўтди.