Reuters агентлиги маълумотига кўра, компаниянинг бозор қиймати 3,86 трлн долларга етди, бу эса Microsoft’нинг 3,69 трлн долларлик қийматига нисбатан 4,3 фоизга кўпдир. Ушбу ўсишга сунъий интеллектга бўлган қизиқиш ва Nvidia’нинг СИ чипларига бўлган талабнинг янада ортиши кутилгани туртки бўлди.
Шу билан бирга, Nvidia ҳозирча Apple’нинг 2024 йил декабрида қайд этилган 3,92 трлн долларлик тарихий рекордини ортда қолдиргани йўқ. Жорий йил июнь ойи охирида Apple капитализацияси 3,1 трлн доллар бўлиб, учинчи ўринни эгаллади.
Технология бозорининг бошқа йирик иштирокчилари — Meta, Broadcom ва Amazon ҳам ўз капитализацияларини сезиларли оширди. Хусусан, Meta 14 фоиз, Broadcom 13,9 фоиз ва Amazon 7 фоизлик ўсишга эришди. Уларнинг бозор қиймати мос равишда 1,86 трлн, 1,3 трлн ва 2,33 трлн долларни ташкил этди.
Wedbush Securities таҳлилчиси Дэниел Айвзнинг фикрича, бу ёзда Nvidia ва Microsoft 4 трлн долларлик капитализацияга эга компаниялар клубига киради. Унинг таъкидлашича, кейинги 18 ойда асосий эътибор 5 трлн долларлик маррага қаратилади, чунки «бу бозор ҳали ривожланишнинг бошида турибди ва уни сунъий интеллект инқилоби бошқармоқда».