«Биз санкциялар ҳақида кўп гаплашдик. У [Путин] улардан мамнун деб айта олмайман. У улар билан курашишни уддалади, лекин бу [янги санкциялар] анча қатъийроқ бўлади. У улар қўлланилиши мумкинлигини тушунади. У профессионал», — деди Трамп Air Force One бортида журналистларга.
Президент Трамп шунингдек, Россияга нисбатан Эрон ёки бошқа давлатларга қараганда анча қаттиқ сиёсат юритаётганини урғулади. Шу билан бирга, у АҚШ Украинага Patriot тизими учун ракеталар етказиб бериш имкониятини кўриб чиқаётганини билдирди. «Уларга [Patriot ракеталари] ҳимоя учун керак. Уларга яна бошқа нарсалар ҳам керак, чунки уларга жиддий зарбалар берилмоқда», — деди Трамп.
Трамп Украина президенти Володимир Зеленский билан 4 июл куни телефон орқали суҳбатлашганини айтди. Унинг сўзларига кўра, суҳбатда Украина ҳаво ҳимоя тизимини янада кучайтириш ва икки давлат мутасаддилари учрашувини ташкил этиш бўйича келишувга эришилган. Трамп Путин билан суҳбатдан сўнг унинг ўт очишни тўхтатиш истаги йўқлигидан қаттиқ норози бўлганини қайд этди. «У [Путин] охиригача боришни ва одамларни ўлдиришни давом эттиришни хоҳлаяпти», — деди Трамп.
The New York Times нашрининг ёзишича, бу мулоқотлар АҚШнинг Украинага қурол етказиб беришни вақтинча тўхтатгани фонида бўлиб ўтди. Хусусан, Patriot тизими учун ракеталар етказиб бериш тўхтатилган. NBC News маълумотига кўра, ушбу қарор АҚШ арсеналлари ҳолатини текшириш натижаларига асосланган. Киевда эса бу қадам АҚШ томонидан урушни тўхтатиш масаласида имтиёзлар сўраш учун босим сифатида баҳоланмоқда.