Politico нашрининг хабар беришича АҚШ президенти Доналд Трамп Украинадаги урушни тўхтатиш имконияти бўйича аниқ ишончга эга эмаслигини билдирди. Унинг сўзларига кўра, бу мураккаб масала ва бунинг натижаси қандай бўлишини олдиндан айтиш мушкул.
Трамп журналистлар билан суҳбатда урушни тўхтатишни ўзининг ташқи сиёсатдаги устувор йўналиши сифатида қайд этди. Бироқ у бу мақсад амалга ошиш-ошмаслиги номаълумлигини очиқ тан олди.
Сайловолди кампаниясида Трамп президентликка келган кунданоқ урушни тўхтатишини ваъда қилганди. Кейинчалик TIME журналига берган интервьюсида бу ваъдани «муболаға» деб баҳолади.
«Украина масаласи — Байденнинг келишуви, менинг эмас. Мен уни якунлашга ҳаракат қиляпман», — деди Трамп. У шу ҳафта Россия президенти Владимир Путин ва Украина президенти Володимир Зеленский билан телефон орқали мулоқот ўтказганини маълум қилди.
Путин билан бўлган суҳбат ҳеч қандай натижа бермаганини қайд этган Трамп, Зеленский билан ўтказилган суҳбатни эса «жуда муҳим ва самарали» деб баҳолади. Улар Украина ҳаво ҳимояси, қўшма мудофаа ишлаб чиқариш ва инвестиция масалаларини муҳокама қилган.
Трамп Путин билан бўлган суҳбатдан қониқмаганини таъкидлади. «У барибир одамларни ўлдиришни давом эттирмоқчи. Бу жуда ёмон», — деди у.
Пентагон бу ҳафта Украинага қурол етказиш жараёнини вақтинча тўхтатганини билдирган эди. Трамп эса ҳозирча қурол етказиш давом этаётганини ва АҚШ Украинага ёрдам беришда давом қилаётганини маълум қилди.