АҚШ Мудофаа вазирлиги расмий баёнот беришича, Украина янада кўпроқ америка қуроллари билан таъминланади. Бу қарор президент Доналд Трампнинг шахсий кўрсатмаси асосида қабул қилинди. Қўшимча қуроллар Киевнинг ўзини Россия ҳужумларидан ҳимоя қилиши учун йўналтирилади.
Пентагон вакили Шон Парнелл таъкидлашича, Вашингтоннинг мақсади — Украинага фақат қурол эмас, балки барқарор тинчлик ва зўравонликни тўхтатишга хизмат қиладиган механизмларни етказишдир. Унинг сўзларига кўра, АҚШ ҳукуматининг устувор йўналишларидан бири — дунё бўйлаб мудофаа соҳасидаги етказиб бериш тизимини самарали сақлашдир.
АҚШ Мудофаа вазирлиги қўшимча қилиб, қурол етказиб бериш сиёсати «Энг аввало Америка» шиорига мос ҳолда шакллантирилаётганини маълум қилди. Трампнинг айтишича, АҚШ Украинага қурол беришни қайта йўлга қўйиши шарт, чунки бу мамлакат ўзини ҳимоя қилиш имконига эга бўлиши керак.
«Биз қурол юборишимиз керак. Улар ўзини ҳимоя қилмоғи шарт», — деди Трамп ўз чиқишида.
Мазкур қарор Пентагон Украинага айрим қуролларни етказиб беришни вақтинча тўхтатганидан сўнг эълон қилинди. Бундан Киев жиддий ташвишга тушган, Вашингтон эса етказиб беришдаги кечикишлар нафақат Украина, балки бошқа давлатларга ҳам тааллуқли эканини таъкидлаган эди.