Times of Malta ва OCCRP маълумотларига кўра, 38 ёшли Оқ уй кадрлар бўйича директори Серхио Гор Совет Иттифоқи даврида Ўзбекистонда туғилгани аниқланди.
Гор ўзининг келиб чиқиши ҳақида маълумот бермаган. The Washington Post газетасининг амалдорга бағишланган мақоласида у Малтадан келган муҳожир сифатида тилга олинган. Доналд Трамп маъмурияти ходимининг малта миллатига мансублиги The New York Post таблоидининг июн ойидаги нашрида ҳам қайд этилган. Унда, шунингдек, Горнинг махфий маълумотларга рухсат олиш учун зарур бўлган таржимаи ҳоли ҳақидаги ҳужжатларни тақдим этмагани айтилган. Амалдорнинг ўзи газетага туғилган мамлакатини ошкор қилишдан бош тортиб, фақат Россия эмаслигини таъкидлаган. Горнинг танишлари The Dispatch нашрига унинг СССРда туғилганини айтишган. Бироқ, илгари бунга бошқа далиллар мавжуд эмасди.
Times of Malta ва OCCRP аниқлашича, Оқ уйнинг кадрлар бўйича директори аслида Серхио Гороховский номи билан 1986 йил 30 ноябрда Тошкентда туғилган экан. Бу маълумот журналистлар қўлига тушган Горнинг Малтадаги кўчмас мулки ҳужжатларида келтирилган. Амалдорнинг адвокати Роберт Гарсон ўз мижозининг Тошкентда туғилганлигини тасдиқлади.
Терговчилар маълумотларига кўра, Гор болалигида Малтада камида беш йил яшаган. Хусусан, у 1996 йилдан 1999 йилгача Витториоза шаҳридаги ўғил болалар учун мўлжалланган католик мактабида таълим олган. Кейинчалик (аниқ вақти кўрсатилмаган) Горнинг оиласи АҚШга кўчиб ўтган ва у ерда фуқаролик олган.
Журналистларнинг маълумотларига кўра, Гор Трамп маъмуриятида ишлашидан аввал ҳам Россияга икки марта ташриф буюрган экан. 2017 йилда у Вашингтондан Москвага учиб келган, Россия пойтахтида бир кун бўлиб, эртаси куни Римга жўнаб кетган. 2018 йилда эса, ўша пайтда республикачи сенатор Ренд Пол билан ҳамкорлик қилаётган Гор, Америка либертариан таҳлил маркази ҳисобланган Катон институти молиялаштирган тадбир доирасида Москвага ташриф буюрган. Бу ташриф «Россия ва АҚШ билан боғлиқ масалаларни ўрганиш, муҳокама қилиш ва таҳлил этиш учун фактларни аниқлаш сафари» деб номланган.
Горнинг адвокати унинг Москвага сафарларини амалдорнинг «сайёҳликка ишқибозлиги» билан изоҳлади. Горнинг 2017 йилдаги Россия пойтахтига ташрифини эса у «транзит парвоз» деб атади.
Axios нашри Серхио Горни Оқ уйдаги Трампнинг энг таъсирли маслаҳатчиларидан бири сифатида таърифлаган. Гор АҚШ президентининг ўғли кичик Доналд Трамп билан ҳамкорликда Трамп-катта ва унинг ҳамфикрларининг китобларини нашр этувчи Winning Team Publishing нашриётини ташкил этган. 2020 йилда Гор Трампнинг сайловолди кампанияси учун маблағ тўплашга масъул бўлган, 2024 йилда эса ҳозирги АҚШ президенти кампаниясига деярли 72 миллион доллар сарфлаган Сиёсий ҳаракатлар қўмитасини тузган. Оқ уйда лавозимни эгаллагач, Гор Трамп маъмурияти ходимларининг содиқлигини текшириш тизимини жорий этган.