IT Park матбуот хизмати хабарига кўра, июн ойида резидентлар сафига 58 та янги экспортчи компания қўшилди. Улардан 29 таси хорижий капитал иштирокида ташкил этилган. Инвесторлар Венгрия, Португалия, Руминия, БАА, Туркия, Индонезия, Япония каби давлатлардан.
Жорий йилнинг июни якунига келиб, экспортга йўналтирилган IT Park резидентлари сони 750 тага етди. Шулардан 228 таси Тошкентдан ташқарида фаолият юритмоқда. Умумий хорижий компаниялар сони 776 тани ташкил этиб, 206 таси минтақаларда жойлашган.
Экспорт салоҳияти юқори бўлган компаниялар орасида Дубай сармоядори иштирокидаги Mont Tech Systems 8,5 млн долларлик SaaS ва IT-консалтинг хизматлари орқали Тожикистон бозорига чиқишни режалаштирмоқда.
Ruby Talent Solutions компанияси эса Португалия ва Венгрия сармояси билан АҚШ бозорига аутсорсинг орқали кадр бошқарув хизматларини экспорт қилмоқчи. Унинг илк йилдаги экспорт прогнози 3 млн долларга яқин.
Руминиялик инвесторлар ташкил этган Accesa компанияси Германия ва Руминия мижозлари учун дастурий таъминот, IT-консалтинг ва дизайн хизматларини экспорт қилиб, 2,2 млн доллар тушум олишни мақсад қилган. Шу орқали 40 та иш ўрни яратилади.
Бундан ташқари, Бразилиялик Guaraqe компанияси АҚШ бозори учун дастурий таъминот ишлаб чиқиш ва қўллаб-қувватлаш хизматлари орқали 1,5 млн долларлик экспортни амалга оширишни режалаштирмоқда.
Йил бошидан буён IT Park’да 636 та янги компания рўйхатдан ўтган бўлиб, уларнинг 284 таси экспортга йўналтирилган. Уларнинг 164 тасида хорижий инвесторлар иштирок этмоқда.