Маълумотларга кўра, Анчелотти 2014–2015 йилларда «Реал Мадрид» бош мураббийи сифатида фаолият юритган даврда, қўшимча даромадларини яшириш мақсадида сунъий компаниялар тузиб, 1 миллион еврога яқин солиқ тўламасликка уринишда айбланган.
Анчелотти апелляция қилинган суд жараёнида бу ҳаракатлар қасддан амалга оширилмаганини билдирган. У ўз маошининг бир қисми имидж ҳуқуқлари орқали тўланганини билганини, аммо бу солиқ тўловига таъсир қилишини тушунмаганини айтган.
Мадрид суди Анчелоттини «молия органлари олдидаги мажбуриятни бузганлик»да айбли деб топиб, уни бир йиллик қамоқ жазоси ҳамда 386 361 евро миқдорида жаримага маҳкум этганини эълон қилди.
Бироқ «Челси», «Бавария» ва «ПСЖ» клубларининг собиқ мураббийи бўлган Анчелотти ҳозирда Испанияда яшамагани, шунингдек, аввал судланмагани ва унга берилган жазо икки йилдан кам бўлгани сабабли қамоқ жазосини ўтамайди.
Суд, шунингдек, уни 2015 йил учун солиқ тўлаш бўйича айбдан оқлади, чунки унинг ўша йили Испанияда доимий фуқаролик яшаш манзили борлиги аниқ исботланмаган.
Шу тариқа, Карло Анчелотти солиқ тўламаган футбол юлдузларига қарши Испаниянинг қатъий чораларига дучор бўлган машхурлар рўйхатига қўшилди.