Сўнгги ҳафталарда АҚШ доллари курси тебранишлари камайганига қарамай, инвестиция банки таҳлилчилари Америка валютасининг яна «хатарлироқ» актив сифатида савдога чиқиши мумкинлигининг кўплаб сабабларини кўрсатмоқда.
АҚШ президенти Доналд Трампнинг савдо урушлари таҳдидлари туфайли долларнинг бу йилги кескин қадрсизланиши унинг «хавфсиз бошпана» мақомини йўқотиши тўғрисидаги тахминларни кучайтирди. Goldman таҳлилчилари бундай сценарийни башорат қилмасалар-да, экспертларнинг фикрича, қисқа муддатда валюта беқарор ҳолатда қолиши мумкин.
Мутахассисларнинг фикрича, 2025 йилнинг «ёрқин» тенденцияларидан бири доллар курсининг АҚШ акциялари билан биргаликда тушиш мойиллигининг кучайиши бўлди. Бу йил бундай динамика ўтган 10 йилга нисбатан икки баробардан кўпроқ кузатилди. Goldman Sachs таъкидлашича, Америка активларининг жозибадорлиги пасайишининг янада ташвишли белгиси ҳам мавжуд — бу акциялар, ғазна облигациялари ва долларнинг бир вақтнинг ўзида қадрсизланиши бўлиб, бу ҳолат ҳам тез-тез учрай бошлади.
26 июнь куни АҚШ президенти Доналд Трамп Федерал захира тизими раҳбари лавозимига бир нечта номзоди борлигини айтганидан сўнг, доллар курси 2022 йилдан буён энг паст даражага тушди. The Wall Street Journal нашрининг тахминига кўра, Трамп бу номзодни кузда эълон қилиши мумкин, аммо амалдаги Федерал захира раиси Жером Пауэллнинг ваколатлари 2026 йил май ойигача давом этади.
Доллар индекси йилнинг биринчи ярмида 10 фоиздан кўпроқ қийматини йўқотди. Financial Times газетасининг ёзишича, бу АҚШ валютасининг 1973 йилдан буён энг ёмон кўрсаткичи бўлди. Шунингдек, АҚШ доллари курси динамикаси 2009 йилдан бери кетма-кет олти ойлик давр ичида энг паст даражага тушди. ФТ нинг таъкидлашича, Америка валютасининг заифлашишига АҚШ президенти Доналд Трамп олиб бораётган савдо ва иқтисодий сиёсат сабаб бўлган.