Киевда 10 июл, пайшанба куни Украина Хавфсизлик хизмати (УХХ) полковниги Иван Воронич отиб кетилди. УХХ матбуот хизмати ўз ходимининг ўлдирилганини тасдиқлади.
«Киев шаҳрининг Голосеев туманида УХХ ходимининг ўлдирилиши бўйича жиноий иш қўзғатилди. Хавфсизлик хизмати ва Миллий полиция жиноятнинг барча ҳолатларини аниқлаш ва айбдорларни жавобгарликка тортиш учун кенг қамровли чоралар кўрмоқда», — дейилади матбуот хизмати хабарида.
Киев ҳуқуқ-тартибот идораларидаги ОАВ манбаларининг маълум қилишича, маҳаллий вақт билан тахминан соат 9:00 да номаълум шахс УХХ полковниги Иван Вороничга яқинлашиб, унга тўппончадан беш марта ўқ узган, сўнгра қочиб кетган. Воронич воқеа жойида ҳалок бўлган.
Олий Раданинг собиқ депутати Игор Мосийчукнинг айтишича, Воронич «Алфа» бўлинмаси деб ҳам номланадиган Махсус операциялар марказининг (МОМ) 16-бошқармаси 1-бўлимининг катта оператив ходими бўлган. The Insider нашрининг эслатишича, ушбу махсус бўлинма ходимлари бошқа вазифалар қаторида Россия ҳудудида диверсия ишлари билан ҳам шуғулланган.
Украиналик собиқ разведкачи Роман Червинский Вороничнинг ўлдирилишига муносабат билдирган ҳолда, унинг 2014 йилдан буён душманга қарши курашиб келганини ва Хизматда ҳозирда Россия учун кўплаб муаммоларни келтириб чиқараётган йўналишга асос солганлардан бири бўлганини ёзган.