Британиянинг The Economist журнали Россиянинг Украинадаги йўқотишлари ҳақида янги таҳлилни эълон қилди. Журнал маълумотларига кўра, 2025 йилнинг 9 июл ҳолатигача Россия ҳарбийлари 190 мингдан 350 минг нафаргача жангчи йўқотган. Ҳар бир Россия аскари ҳаёти Россия армиясига бор-йўғи 3,8 гектар украин ерини эгаллашга «тушмоқда».
The Economist журнали 10 июл куни чоп этган таҳлилий мақоласида Россиянинг Украинадаги умумий йўқотишларини 900 мингдан 1,3 миллион кишигача деб баҳолади. Бу баҳолар нафақат Ғарб манбалари, балки NASA спутник маълумотлари ва бой берилган ерлар ҳақидаги таҳлилларга асосланган.
Муҳаррирлар айтишича, уларнинг модели фронт чизиғидаги ўзгаришлар ва ёнғинлардан олинган маълумотлар асосида Россия армиясининг ҳар кунлик йўқотишларини ҳисоблайди. Масалан, 2025 йилнинг 1 майидан 9 июлигача Россия армияси 31 минг киши йўқотган. Бу даврда ҳар куни тахминан 15 км² украин ҳудуди эгалланган ва ҳар бир 3,8 гектар ер бир аскарнинг ҳаётига «тушган».
Журнал таъкидлашича, Россия бу суръатда Донецк, Луҳанск, Херсон ва Запорижжя областларини тўлиқ эгаллаши учун камида 2029 йилгача кураш олиб бориши керак. Бутун Украинани эгаллаш учун эса 89 йил керак бўлади.
Ҳисоблаш модели асосан «Медуза» ва «Медиазона» каби мустақил манбалардан олинган маълумотлар, «Мерос ишлари реестри» ва Росстат маълумотларига таянган. Шу билан бирга, таҳлилчилар моделнинг аниқлиги чегараланганини тан олишган. Масалан, 2023 йилда фронт чизиғида деярли ўзгариш бўлмаган, аммо Россия 50 минг киши йўқотган.
Бундан ташқари, сўнгги икки йилда FPV-дронлар кенг қўлланилмоқда ва бу турдаги қуроллар йўқотишларни аниқлашда спутник маълумотларига асосланган моделлар учун қийинчилик туғдиради.
The Economist’нинг хулосасига кўра, йўқотишларнинг аниқ ҳисоб-китоблари фақатгина шахсий маълумотлар ва расмий ҳужжатлар орқали тасдиқланган ҳолда ишончли бўлади.