Халқаро футбол федерацияси (FIFA) 2025 йил июл ойи учун янгиланган рейтингни эълон қилди. Унга кўра, Ўзбекистон Осиё футбол конфедерациясида Япония, Эрон, Жанубий Корея, Австралия ва Қатардан кейинги олтинчи ўринни эгаллаб турибди. Рейтингда биздан кейин Ироқ ва Саудия Арабистони жамоалари жой олган.
Ўзбекистон жамоаси июн ойида 2026 йилда АҚШ, Канада ва Мексикада бўлиб ўтадиган жаҳон чемпионати саралаш босқичининг икки муҳим учрашувини ўтказди. 5 июн куни ОАЭга қарши сафарда 0:0 ҳисобида дуранг қайд этилиб, бу натижа орқали жамоамиз тарихда илк бор мундиалга йўлланмани қўлга киритди.
10 июн куни Тошкентдаги «Бунёдкор» стадионида Қатарга қарши ўйинда Ўзбекистон 3:0 ҳисобида ишончли ғалаба қозонди. Бу натижалар миллий жамоанинг халқаро майдондаги нуфузини оширди ва FIFA рейтингидаги ўрнини мустаҳкамлади.
Айни пайтда FIFA рейтингида биринчи ўринда Аргентина, иккинчи ўринда Испания ва учинчи ўринда Франция жамоалари жойлашган.