Доналд Трамп NBC News телеканалига берган интервьюсида Россия билан боғлиқ жиддий баёнот 14 июл, душанба куни эълон қилинишини билдирди. Унинг сўзларига кўра, «Россиядан ҳафсаласи пир бўлган» ва бу масалада жиддий қарорлар қабул қилинади.
Трамп сўнгги ойларда Украинага қурол етказиб бериш тартибида ўзгаришлар бўлганини айтди. Унга кўра, АҚШ қуролларни тўғридан-тўғри Украинага эмас, балки НАТОга жўнатади. НАТО эса уларни Украинага етказади ва бунинг тўлиқ қийматини тўлайди. Ушбу келишув июнь ойидаги НАТО саммитида келишиб олинган.
Шу билан бирга, Трамп Россияга нисбатан янги санкциялар ҳақида ҳам гапириб ўтди. Унинг таъкидлашича, санкцияларни жорий этиш ёки этмаслик тўғрисидаги якуний қарор Президент ихтиёрида қолади. Конгресс бу бўйича қонун лойиҳаси тайёрлаётган бўлса-да, амалий қарорни унинг ўзи қабул қилади.
10 июль куни АҚШ давлат котиби Марко Рубио Малайзия пойтахти Куала-Лумпурда Россия делегацияси билан учрашган. Унда Украина можаросини ҳал қилиш бўйича «йўл харитаси» муҳокама қилингани айтилган. Рубио баёнотига кўра, Россия томони янги таклифлар билдирган, аммо уларнинг мазмуни очиқланмаган.
Трампнинг 14 июл куни қилмоқчи бўлган баёноти Россия-АҚШ муносабатларида янги босқични бошлаб бериши мумкин.