2025 йил 10 июл куни йўлланган расмий мактубда Трамп Канада бош вазири Марк Карнига мурожаат қилган. У март ойида жорий этилган 25 фоизлик тарифни янада кучайтиришни режалаштираётганини таъкидлаган. Янги тарифлар 1 августдан амалга кириши кутилмоқда.
Трамп мактубида «Фентанил оқими – Канада билан мавжуд муаммоларнинг фақат бири, бундан ташқари яна кўплаб тариф ва нотариф тўсиқлар бор», деб ёзган.
АҚШ, Мексика ва Канада ўртасидаги 2020 йилдаги келишув (USMCA) ҳозирча товарларни бождан ҳимоя қилмоқда, аммо бу битим 2026 йилда қайта кўриб чиқилади. Трампнинг сўзларига кўра, бу чеклов USMCA доирасида ҳам ўзгариши мумкин.
Канада АҚШнинг Мексикадан кейинги иккинчи йирик савдо ҳамкори ҳисобланади. Аввалги санкцияларга жавобан Канада ҳам қарши чоралар кўрган ва Трампнинг «Канада АҚШнинг 51-штати бўлиши мумкин» деган баёнотларига кескин муносабат билдирган.
Марк Карни бу йил апрелда бош вазир этиб сайланган ва ташқи сиёсатида Европага яқинлашишни афзал кўрмоқда. У Британия ва Европа Иттифоқи билан алоқаларни мустаҳкамлашга ҳаракат қилмоқда.
Май ойида Трамп билан учрашув чоғида Карни тарифларни қайта кўриб чиқиш бўйича сабр қилишга тайёрлигини билдирган эди.
Трамп бу каби тариф мактубларини 23 давлатга йўллаган, жумладан, Бразилияга ҳам 50 фоизлик санкция билан таҳдид қилган.