13 июл куни тарқатилган расмий баёнотга кўра, Киев полицияси ва Украина хавфсизлик хизмати (СБУ) тезкор ходимлари ҳамкорликдаги иш орқали гумонланувчилар шахсини аниқлашга муваффақ бўлди. Улар Россия махсус хизмати томонидан Украинадаги СБУ ходимини йўқ қилиш учун жалб этилган.
Маълумотларга кўра, икки киши қурол сақланадиган махсус жой ҳақида олдиндан маълумотга эга бўлган. Улар шу жойдан қурол олиб, сўнг Иван Воронични ўз уйи олдида, машинасига йўналган пайтда ўққа тутган. Полковник бир неча марта яқин масофадан отилган ўқлардан ҳалок бўлган.
ФСБ агентларини қидириш бўйича махсус операцияга СБУ раҳбари Василий Малюк шахсан бошчилик қилган. Қотилликда гумонланганлар қўлга олиш пайтида қаршилик кўрсатишган ва жойида ўлдирилган.
«Страна» интернет нашрининг маълум қилишича, ўлдирилган гумонланувчилардан бири — миллати озарбойжон бўлган 34 ёшли Нармин Гулиева бўлиб, унинг эркак шеригининг шахсига ҳозирча аниқлик киритилмаган. (Кейинчалик иккинчи гумондор ҳам озарбойжон миллатига мансуб Ҳақали Гулализода экани маълум бўлди).
Жиноятдан сўнг ижтимоий тармоқларда икки киллернинг ўлиб ётгани сурати пайдо бўлган.