Дмитрий Песков бу ҳақда «Эксперт» журналига берган интервюсида гапирди. Унинг таъкидлашича, Россияда ҳозир амалда «мисли кўрилмаган ҳарбий цензура» ҳукм сурмоқда. Бу, унинг фикрича, Россияни «дискредитация қилиш» билан шуғулланаётган оммавий ахборот воситаларининг фаолиятини чеклаш зарурати билан изоҳланади.
Песковнинг айтишича, бу вазиятдан сўнг мамлакат медиа маконида «ватанпарварлик руҳдаги контент» кўпайган. У Россияни танқид қилувчи медиа таҳририятлари олдин таҳририт сиёсати сифатида ўз юртига нисбатан скептик муносабатни илгари сураётганини айтди.
«Ўтмиш хатоларидан хулоса чиқардик. Энди Россия ҳақида фақат салбий ёки умуман ҳеч нарса ёзмайдиган «Медуза»ларга ўхшаган нашрларга йўл бўлмайди», — деди Песков. Бироқ у цензура юмшатилгандан кейин муаммолар ва ютуқларни холис ёритадиган нейтрал медиа пайдо бўлишига умид билдирди.
Бу Кремл расман ҳарбий цензура мавжудлигини тан олган илк ҳолат ҳисобланади. Илгарироқ, 2023 йил сентябрда ҳам Песков Россия коллектив Ғарб билан «критик қарама-қаршилик»да экани учун чекловлар зарурлигини айтганди.
Президент Владимир Путин эса аввалроқ Россияда «эркин ОАВ» фаолият юритишини айтган, фақат қонунларга риоя қилиш талаб этилишини таъкидлаган эди. Унинг сўзларига кўра, давлат таҳририят сиёсатидан қатъи назар, барча медиа билан ҳамкорлик қилади.