Республикачи сенатор Линдси Грэҳэмнинг айтишича, АҚШ яқин кунларда Украинага ўзини ҳимоя қилиш учун керакли бўлган миқдорда қурол етказиб беришни бошлайди. У бу ҳақда CBS News телеканалига берган интервьюсида маълум қилди ва эртага Доналд Трамп томонидан қилиниши кутилган баёнотни жиддий қабул қилишга чақирди.
Грэҳэмнинг таъкидлашича, Америка шунингдек Европа иттифоқчиларига ҳам катта ҳажмда қурол сотишни бошлайди ва бу қуроллар Украина учун ҳам манфаатли бўлиши мумкин. Шунингдек, у Россия активларининг музлатилиши ва келгусида уларга нисбатан олинадиган чоралар ҳақидаги янгиликларни кузатишни тавсия қилди.
«Путин бизнинг чарчашимизни кутди. У қаттиқ адашди», — деди сенатор. Унинг фикрича, Конгресс ҳозир АҚШ тарихидаги энг катта санкциялар пакетини қабул қилиш остонасида турибди.
Сенатор ўз мурожаатида Хитой, Ҳиндистон ва Бразилияни ҳам огоҳлантирди: «Агар сиз Путинга ёрдам беришда давом этсангиз, бунинг учун катта тўловга тайёр туринг».
Бу орада НАТО Бош котиби Марк Рютте 14 июл куни Вашингтонга ташриф буюриши маълум бўлди. У ерда 15 июл куни президент Доналд Трамп, давлат котиби Марко Рубио ва мудофаа вазири Пит Ҳегсет билан учрашиши режалаштирилган. НАТО маълумотига кўра, ташриф сабаби аниқ айтилмаган, аммо Трамп аввалроқ АҚШ НАТО орқали Украинага қурол етказишга тайёр эканини билдирган ва душанба куни Россияга доир «катта баёнот» берилишини маълум қилган.
Шу вақтгача Трамп маъмурияти фақат Жо Байден томонидан олдин тасдиқланган қурол турларини юбориб келаётгани таъкидланмоқда.