АҚШ президенти Доналд Трамп НАТО бош котиби Марк Рютте билан учрашув ўтказди. Унда у Россиянинг Украинага нисбатан позициясидан қаттиқ норозилигини билдириб, Кремл урушни тўхтатиш бўйича келишувга 50 кун ичида эришмаса, жиддий иқтисодий жазо чоралари қўлланишини маълум қилди.
Трампнинг сўзларига кўра, агар музокараларда ҳеч қандай илгарилаш бўлмаса, Россия ва унинг савдо ҳамкорларига нисбатан «иккиламчи божлар» 100 фоизгача оширилиши мумкин.
Шунингдек, у Украинага қурол етказиб бериш масаласида АҚШ ва Европа Иттифоқи келишувга эришганини айтди. Янги тизимга кўра, қурол харажатлари Европанинг зиммасига тушади.
Трамп НАТО ва АҚШнинг алянсдаги доимий вакили Мэттю Уитакер Украинага қурол етказиб беришни мувофиқлаштиришини билдирди.
Трампнинг Truth Social тармоғида ёзишича, АҚШ дунёдаги ҳамкорларидан узоқ йиллар давомида савдо ва ҳарбий харажатлар соҳасида зарар кўрган. «Бу миллионлаб долларларга тушди ва энди бу давр тугади», — деб таъкидлади у.
Bild нашри ёзишича, Трамп Байден маъмурияти ваъда қилган қуролларни Киевга етказишга тайёр, аммо молиявий юкни Европа зиммасига ўтказмоқчи. Шу тариқа, у АҚШнинг Украинага нисбатан сиёсатини қайта шакллантиришга ва Россияга босимни кучайтиришга ҳаракат қилмоқда.