13 июл куни ҳарбийлар ва мудофаа вазири Рустем Умеров иштирокида ўтказилган кенгайтирилган йиғилишда Зеленский Россиянинг ёздаги ҳужум режалари амалга ошмаётганини қайд этди. Унинг таъкидлашича, ҳар бир ҳужумга асимметрик ва қатъий жавоб берилади. Зеленскийнинг сўзларига кўра, Украинанинг турли йўналишлардаги мудофаа салоҳияти рус армиясининг ҳужумий ҳаракатларини самарали тўхтатмоқда.
Зеленский Telegram орқали қилган баёнотида шундай деди: «Бўлимларимиз босқинчиларни йўқ қилишда давом этади ва урушни Россия ҳудудига кўчириш учун қўлидан келган барча нарсани амалга оширади. Янги узоқ масофали зарбаларга тайёргарлик кўряпмиз».
Украина Қуролли Кучлари Бош қўмондони Александр Сирский эса Херсон вилоятида бир ёшли боланинг ҳалокатига сабабчи бўлган россиялик ҳарбийларнинг йўқ қилинганини президентга маълум қилган. Зеленский буни «адолатли жавоб» деб атади.
Сирский шунингдек, Суми ва Харкив чегара ҳудудлари, Запорижжя, Покровск ва Новопавловск йўналишларидаги ҳолат ҳақида маълумот берган. Унинг айтишича, Украина мудофаа салоҳияти ушбу ҳудудларда ҳам мустаҳкамланмоқда.
Президент АҚШ генерали Келлогнинг Украинага ташрифи арафасидаги тайёргарликлар ҳамда ҳарбий шериклар билан қурол етказиб бериш бўйича ҳамкорликлар давом этаётганини маълум қилди. Унинг сўзларига кўра, бугунги кунда Украинанинг қуроллар эҳтиёжининг 40 фоизи мамлакат ичида ишлаб чиқарилаётган бўлиб, бу кўрсаткични янада ошириш мақсад қилинган.