Ўзбекистон Республикаси Марказий банки «CitiBank AS» банкининг Тошкентдаги ваколатхонасини расман аккредитация қилди. Мазкур қарор орқали халқаро банк мамлакатда молия бозорини ўрганиш ва маҳаллий молиявий ташкилотлар билан алоқаларни кенгайтириш имконига эга бўлди.
Марказий банк реестридаги маълумотларга кўра, «CitiBank AS» ваколатхонасига берилган аккредитация 2028 йил 9 июлга қадар амал қилади. Ваколатхона раҳбари сифатида Аббос Жўрабоев кўрсатилган. Шу билан бирга, «CitiBank AS» — АҚШнинг «CitiBank» молия гуруҳига тегишли бўлиб, Туркиядаги расмий филиали ҳисобланади.
Жорий йил июн ойида «Citigroup» компанияси Ўзбекистонда ўз ваколатхонасини очишини эълон қилган ва бу жараён Инвестициялар, саноат ва савдо вазири Лазиз Қудратов ҳамда «Citigroup» делегацияси ўртасидаги музокаралар орқали амалга оширилган. Томонлар DXШ лойиҳалари, экспортни қўллаб-қувватлаш ва инвестиция жалби каби йўналишларда ҳамкорлик қилишга келишиб олган.
Ушбу жараён 2023 йил кузида Ню-Йоркда Президент Шавкат Мирзиёев ва «Citigroup» раиси Жон Дуган ўртасида бўлиб ўтган учрашувда белгиланган мақсадларнинг амалий ифодасидир. Унда молия бозорини ривожлантириш, қимматли қоғозлар бозорида ликвидликни ошириш ва хорижий сармоя жалб қилиш масалалари муҳокама қилинган эди.
Айни вақтда Ўзбекистонда 8 та хорижий банк ваколатхонаси фаолият юритмоқда. Улар орасида Жанубий Корея, Германия, АҚШ, Россия ва Хитой банкларининг офислари мавжуд. Эслатиб ўтамиз, яқинда Тожикистоннинг «Oriyonbank» ваколатхонаси ўз фаолиятини тўхтатган.