Мета компанияси Facebook ижтимоий тармоғида оригинал бўлмаган контентни тарқатаётган аккаунтларга қарши қўшимча чоралар кўрилишини эълон қилди. Бу ҳақда TechCrunch нашри хабар берди.
Хусусан, бошқаларнинг матнлари, суратлари ва видеоларини тизимли равишда қайта жойлаштирувчи фойдаланувчилар чекловларга дучор бўлади.
Бу чекловлар жорий йил бошидан бери амалга оширилаётган кенг қамровли назорат чораларининг давомидир. Мета ўзини контент яратувчиси сифатида кўрсатган 10 миллионга яқин аккаунтни ўчирган. Шунингдек, 500 мингта спам тарқатувчи аккаунтга нисбатан чора кўрилган.
Янги сиёсатга кўра, бошқаларнинг контентидан суиистеъмол қилувчи аккаунтлар Facebook монетизация дастурларидан вақтинча маҳрум қилинади. Уларнинг постлари тарғибот ҳажми кескин қисқаради. Шунингдек, изоҳлар рейтинги пасайтирилади ва контент тарқалиш кўлами чекланади.
Бундан ташқари, Мета такрорий видеоларга ҳаволаларни автоматик тарзда аниқлаб, томошабинларни асл контентга йўналтирувчи махсус тизимни синовдан ўтказмоқда. Бу тизим сунъий интеллект технологиялари асосида ишлайди.
Компания таъкидлашича, оддий фойдаланувчилар — масалан, тренддаги контентга изоҳ ёзган ёки бўлишганлар — жазога тортилишмайди. Чекловлар фақат тизимли равишда бошқаларнинг контентини ўзлаштирувчи аккаунтларга нисбатан қўлланилади.
Мазкур чоралар YouTube томонидан ҳам шунга ўхшаш сиёсат жорий этилганидан сўнг эълон қилинди. Бугунги кунда сунъий интеллект орқали яратилаётган видео ва тасвирлар оммалашиб бораётгани оригиналлик муаммосини янада долзарб қилмоқда.