НАТО бош котиби Марк Рютте Россиянинг Украина билан тинчлик музокараларидаги ёндашувини очиқ танқид қилди. У Fox News телеканалига берган интервюсида Россия делегацияси раҳбари, президент Владимир Путиннинг ёрдамчиси Владимир Мединскийни масхара қилиб чиқди.
Рюттенинг таъкидлашича, Россия ҳозирги вазиятни муҳокама қилиш ўрнига ўтмиш воқеалари ҳақида баҳсларга берилиб кетмоқда. «1700 йилда нима бўлганини айтиб берадиган тарихчини юборишнинг ҳожати йўқ. Бугунги кун ҳақида мазмунли музокаралар керак», — деди у.
Унинг фикрича, Украина тезроқ тинчликни истайди ва Россияни мулоқотга мажбурлаш учун Ғарб босимни кучайтириши лозим. Рютте санкциялар ва сиёсий таъсир воситаларини қўллашни муҳим, деб ҳисоблайди.
Шу билан бирга, у АҚШ президенти Доналд Трампни Россия билан музокара жараёнини жонлантиргани учун миннатдорчилик билан тилга олди. «Трамп буни қила оладиган ягона шахс эди. Унинг шарофати билан руслар билан суҳбат бошланди. Энди асосийси уни шундай давом эттириш керакки, у ҳақиқий натижага эга бўлсин», — деди Рютте.