2025 йилнинг биринчи ярми якунларига кўра, «Тадбиркорликни ривожлантириш компанияси» АЖ орқали 13 мингдан зиёд бизнес лойиҳаларга 1 трлн 774 млрд сўмлик молиявий кўмак кўрсатилди. Бу ҳақда компания матбуот хизмати раҳбари Абдулла Буврабоев маълум қилди.
Охирги етти йил ичида ушбу компания ёрдамида 64 мингдан зиёд лойиҳага жами 19,5 трлн сўмлик ёрдам ажратилган. Фақат 2025 йилнинг биринчи ярмида 13 мингдан зиёд тадбиркор молиявий ёрдам олган.
Молиявий кўмакнинг катта қисми қишлоқ хўжалиги соҳасига тўғри келади — 29 621 лойиҳа учун 9,5 трлн сўм. Хизматлар соҳасида 21 802 лойиҳа (5 трлн сўм), саноатда эса 12 447 лойиҳа (4,9 трлн сўм) қўллаб-қувватланган.
33 593 лойиҳа бўйича кредит фоизларини қоплашга йўналтирилган компенсациялар ажратилган (6,7 трлн сўм). 13 880 лойиҳа эса 10,6 трлн сўмлик кафолатлар орқали қўллаб-қувватланган. Қўшимча равишда 131 та портфеллик кафолат ҳам берилган.
Президентнинг 2023 йил 10 ноябрдаги ПФ–193-сонли фармони асосида «ипотека хизматлари» модели бўйича 41 та бизнес-лойиҳа 221 млрд сўмга молиялаштирилган. Шунингдек, микрокредитларни қайта молиялаш орқали 16 151 лойиҳага 1,5 трлн сўм ажратилган.
Шу жумладан, 9 553 та аёллар лойиҳаларига 1,9 трлн сўм, 8 мингдан ортиқ «яшил» ва энергия тежовчи лойиҳаларга 2,1 трлн сўм, иқтисодий жиҳатдан қийин туманларда 13 603 лойиҳага 3,7 трлн сўмлик ёрдам берилган. Жами 400 мингга яқин янги иш ўринлари яратилган.