Давлат экологик экспертизаси маркази маълумотларига кўра, эндиликда фаолиятнинг экологик хавф даражаси 4 тоифа эмас, 3 тоифага ажратилади. Бу ўзгариш халқаро амалиёт ва стандартлар талабларига мослашиш мақсадида амалга оширилган.
Яна бир муҳим янгилик — экологик хулоса беришда жамоатчилик фикрини инобатга олиш мажбурий қилиб белгиланди. Шунингдек, атроф-муҳитга таъсирни баҳолаш ва стратегик экологик баҳолашнинг аниқ мезонлари жорий қилинди.
Жараён шаффофлигини ошириш мақсадида «Электрон ҳукумат» тамойилига асосланган автоматлаштирилган ахборот тизими ишга туширилади. Бу тизим орқали ҳужжатлар тақдим этиш ва хулоса бериш жараёнлари рақамлаштирилади.
Қонунчиликда илк бор атроф-муҳитга таъсирни баҳолаш тартиби аниқ ва тўғридан-тўғри қонун нормаларида белгиланди. Бу ечим давлат экологик экспертизаси ишида аниқлик ва масъулиятни кучайтиради.
2024 йилнинг ўзида экологик эксперт органлари 32 мингга яқин хулоса берган. Улардан 700 таси белгиланган экологик талабларга жавоб бермагани учун рад этилган. Бу лойиҳалар сифати ва уларни тайёрловчи мутахассисларга бўлган талабни кучайтириш зарурлигини кўрсатади.
Ҳозирда мамлакатда 400 га яқин лойиҳа ташкилотлари ва тадбиркорлик субъектларида 2000 нафарга яқин лойиҳачи мутахассис фаолият юритмоқда.