АҚШ президенти Доналд Трамп огоҳлантирган босимлар — Россия билан савдо қилувчи давлатларга иккинчилама санкциялар ва оташ тўхтатилиши учун берилган 50 кунлик муҳлат — Москва раҳбарияти фикрини ўзгартирмаган. Путин Ғарб талабларини қабул қилмагунича урушни давом эттириш тарафдори.
Бу ҳақда Reuters Кремлга яқин уч манбага таянган ҳолда хабар берди.
Манбалардан бири таъкидлашича, фронтдаги вазият Россия армияси учун яхши якунланса, Путин янги ҳужумни Днепропетровск, Суми ва Харкивга йўналтириши мумкин. Агар эса Украинанинг қаршилиги мустаҳкам бўлиб қолса, Россия фақат аннексия қилинган тўрт област билан қаноатланиши мумкин.
Путин НАТОнинг кенгайишини тўхтатиш ва Украинанинг ҳарбий салоҳиятини чеклашга оид ҳуқуқий кафолатлар талаб қилмоқда. Шу билан бирга, у Киевга нисбатан хавфсизлик кафолатларини муҳокама қилишга тайёр эканини билдирган. Аммо бу қандай амалга оширилиши аниқ эмас.
Reuters манбаларига кўра, Путин Ғарб давлатларидан тинчлик шартлари юзасидан жиддий мулоқот бўлмаган, деб ҳисоблайди. Шу боисдан у мақсадларига эришмагунча урушни тўхтатиш ниятида эмас. Шунингдек, у Россия иқтисодиётининг устунлигига ишонмоқда: мамлакатдаги ўқ-дорилар ва бомбалар ишлаб чиқариш ҳажми НАТО давлатларининг жами ишлаб чиқаришидан кўп, дейилади хабарда.