Ускудар университети мутахассислари ва халқаро таҳлилчилар фикрича, сунъий интеллект (СИ) дастурлари ишлаб чиқилиши ва фаолияти жараёнида катта миқдорда энергия ва сув сарфланади. Бу эса глобал миқёсда сув ресурсларига бўлган босимни кучайтириши мумкин.
Инжи Қорақошнинг таъкидлашича, СИ учун юқори унумдор ҳисоблаш ускуналари керак бўлади. Уларнинг қизиб кетишининг олдини олиш мақсадида совутиш тизимларида катта ҳажмда чучук сув ишлатилади. Бир моделни ишлатиш жараёнида тахминан 700 минг литр чучук сув тўғридан-тўғри буғланиши мумкин.
Калифорния университети тадқиқотига кўра, 2027 йилгача СИ тизимлари томонидан 4,2–6,6 млрд куб метргача сув истеъмол қилиниши мумкин. Бу сув асосан ичимлик ва маиший эҳтиёжлар учун керак бўлган ер усти сув манбаларидан олинади.
Шунингдек, чиплар, серверлар ва сунъий идрок моделлари яратилишида ҳам электр энергияси ишлатилади. Унинг ишлаб чиқарилишида ҳам билвосита равишда катта миқдорда сув керак бўлади. Бу жараёнлар нафақат сув инқирозини, балки карбонат ангидрид эмиссиясини ҳам кучайтиради.
Экологик барқарорликни таъминлаш мақсадида экспертлар СИ билан боғлиқ жараёнларда сув ва энергия изини мунтазам кузатиш, қайта тикланадиган энергия манбаларига ўтиш ва совутишда ичимлик сувидан фойдаланишни чеклашни тавсия қилмоқда.