Туркиянинг «Истанбул Башакшеҳир» клуби Россиянинг ЦСКА жамоасида тўп сураётган Аббосбек Файзуллаев билан келишувга эришгани ҳақида туркиялик журналист Осман Алтунтерим маълум қилди. Унга кўра, Москва клуби ўзбекистонлик футболчи учун 7 миллион евро миқдорида маблағ ишлаб олади.
Файзуллаев 2023 йилдан буён ЦСКА сафида тўп сурмоқда. 2024/25 йилги мавсумда у жамоа таркибида 39 учрашувда иштирок этди, учта гол урди ва саккизта голли узатма берди. Шу билан бирга, у Россия Кубоги ва Суперкубогини жамоаси билан қўлга киритган.
2022 йилда ЦСКА футболчини Тошкентнинг «Пахтакор» жамоасидан 500 минг евро эвазига сотиб олган эди ва 2026 йилгача шартнома имзолаганди. Ҳозиргача у ЦСКА сафида 72 учрашувда майдонга тушиб, 8 та гол ва 22 та ассист билан ажралиб турган.
Футболчи келажаги ҳақида турлича фикрлар янграмоқда. СССРнинг собиқ футболчиси Владимир Пономарёв «Советский спорт» нашрига берган интервюсида Файзуллаев Туркия чемпионатида муваффақият қозона олишига шубҳа билдирди. Унинг фикрича, Файзуллаев ҳозирги ҳолати билан Европа ёки Туркия учун етарли даражада тайёр эмас.
Эслатиб ўтамиз, Аббосбек Файзуллаевдан аввалроқ, яна бир ўзбекистонлик футболчи Элдор Шомуродов ҳам «Истанбул Башакшеҳир»га келиб қўшилган. У «Рома»дан ижара асосида ўтган бўлиб, мавсум охирида уни сотиб олиш имконияти мавжуд.