2025 йилнинг апрел ойида Президент Шавкат Мирзиёев сертификатлаш бўйича расмийлаштириш жараёнларини соддалаштириш ва юқори хавфга эга маҳсулотлар учун давлат рўйхатидан ўтказиш талабини бекор қилиш ҳақида фармон чиқарганди. Унга кўра, витринали музлаткичлар каби техникалар учун мувофиқлик декларацияси жорий этилиши керак эди.
Шу билан бирга, импорт қилувчилар ва ишлаб чиқарувчилар айни пайтгача ушбу фармон амалда тўлиқ ишламай келаётганини маълум қилишди. UzBev уюшмаси раҳбари Алфия Мусинанинг таъкидлашича, 5 мингдан зиёд витринали музлаткич уч ойдан зиёд божхона омборларида туриб қолган. Маҳаллий ишлаб чиқарувчилар техник талабларга тўлиқ жавоб бера олмагани сабабли, хорижий ускуналарга эҳтиёж сақланиб қолган.
Таъкидланишича, Техник тартибга солиш агентлиги — «Ўзстандарт» ҳали ҳам фармонни амалга ошириш механизми ишлаб чиқилмаганини асос қилиб, расмийлаштиришни кечиктирган. Жамоатчилик муҳокамаси, журналистлар ва Савдо-саноат палатаси аралашувидан сўнг масала ечим топди. Узоқ кутилган музлаткичлар сертификат олиб, савдо нуқталарига етказилди.
Бизнес вакиллари бундай муаммоларни ҳар гал қўлбола йўллар билан ҳал қилиш самарасиз эканини таъкидлашмоқда. UzBev ва «Ўзэлтехсаноат» ушбу масалада янги талаблар рўйхатини ишлаб чиқди ва маҳаллий ишлаб чиқарувчиларни бозор талабларига мослашишга чақирди.
Ҳозирда «Ўзстандарт» халқаро амалиёт асосида мувофиқлик декларациясини жорий этиш устида иш олиб бормоқда. UzBev бу жараённи такомиллаштириш учун ўз экспертларини жалб этишга тайёр эканини билдирган.