Арманистон Бош вазири Никол Пашинян 2022 йилда Қорабоғни Озарбойжон таркибида эканини расман тан олганини, аммо бу қарор анча аввал қабул қилиниши кераклигини айтди.
Пашиняннинг сўзларига кўра, тан олишгача Арманистон КХШТга мурожаат қилган, аммо ташкилотдан аниқ позиция ололмаган. «Биз савол бердик: агар чегара ноаниқ бўлса, у ҳолда «қизил чизиқ» қаерда? Ҳамкорларимиз бизнинг ҳудудий яхлитлигимизни тан оладими? Ва энг муҳими — биз ўзимиз тан оламизми?» — дея изоҳлади у.
Бош вазир шунингдек, 2022 йилда Озарбойжоннинг Нахичивон ва бошқа ҳудудлари ўртасидаги транзитни бошқариш учун халқаро компанияни жалб қилишни таклиф этганини эслатди. Унга кўра, мазкур ғоя халқаро амалиётда front office сифатида тан олинган. «Агар бунга қизиқиш бўлса, биз муҳокама қилишга тайёрмиз», — деди Пашинян.
Пашинян Ереваннинг КХШТдан чиқиш ва Европа Иттифоқига аъзо бўлиш ниятини ҳам расман тасдиқлади. «Арманистон ЕИ аъзоси бўлишни истайди», — дея қатъий баёнот берди у.
Аввалроқ АҚШ президенти Доналд Трамп ўз чиқишида Озарбойжон-Арманистон можароси якунланаётганини маълум қилган эди. Шунингдек, АҚШнинг Туркиядаги элчиси Том Барак Зангезур йўлагини юз йиллик муддатга ижарага олиш таклифини илгари сурган.
Туркия президенти Ражаб Тоййиб Эрдўған эса Боку ва Ереван ўртасида тузиладиган сулҳ шартномаси минтақадаги вазиятни кескин ўзгартиришини ва янги имкониятларга йўл очишини таъкидлаганди.