«Anadolu» агентлиги хабар беришича, зўравонликлар друзлар етакчиси Ҳикмат ал-Ҳижрий тарафдорлари ҳукумат билан аввал тузилган келишувга қарши чиққани ортидан бошланган. Улар ўз ҳудудларидаги бадавийларни чиқариш чораларини кўра бошлаган. Бу эса бадавийлар томонидан қарши ҳужумлар билан жавоб берилган.
Маълумотларга кўра, юзлаб қуролланган араб қабилалари Суриянинг бошқа вилоятларидан келиб, бадавийлар сафини қўллаб-қувватлаган. 17 июл куни улар друзлар назоратида бўлган бир нечта аҳоли пунктларини эгаллаб, Сувайда шаҳрининг ғарбий қисмига етиб келган. Друз кучлари марказга чекиниб, мудофаани у ерга жойлаштирган. Ҳозирда шаҳарнинг ғарбий кириш қисмида отишмалар давом этмоқда.
Сурия хавфсизлик кучлари тўғридан тўғри аралашмаяпти, аммо Сувайда йўлларида назоратни кучайтирган.
13 июлда бошланган очиқ тўқнашувлар орадан кўп ўтмай кенг кўламли жангларга айланган. Ҳукумат кучлари вазиятни назорат қилишга ҳаракат қилган, лекин друз тузилмаларининг ҳужумлари натижасида бир неча ўнлаб аскар ҳалок бўлган. Вақтинча оташкесимга эришилган, бироқ у ҳам тез орада бузилган.
16 июл куни Исроил Сурия ҳудудларига бир неча зарба берди. Президент саройи, Бош штаб ва Мудофаа вазирлигига қарши ҳаво ҳужумлари амалга оширилди. Шу куни маҳаллий воситачилар иштирокида Сувайдада яна оташкесимга эришилди. Аммо шу билан бирга Исроил авиацияси Дамашқ ва Дараа шаҳарларини ҳам нишонга олди.