Европа Иттифоқи Россияга нисбатан яна бир санкциялар тўпламини маъқуллади. Бу ҳақда ЕИ ташқи сиёсат ва хавфсизлик сиёсати бўйича олий вакили Кая Каллас маълум қилди.
Калласнинг айтишича, янги санкциялар пакети «энг қаттиқ» чоралардан иборат бўлиб, Россиянинг нефт экспортларига хизмат қилаётган «яширин флот»ни нишонга олган. Жумладан, Ҳиндистондаги «Роснефт»га тегишли энг йирик нефт қайта ишлаш заводи учун ишлаб келаётган 105 та танкерга чекловлар жорий қилинди.
Бундан ташқари, ЕИ томонидан Россияга нисбатан қўлланаётган санкцияларни четлаб ўтишда иштирок этаётган банклар ва компанияларга нисбатан ҳам чоралар кучайтирилди. Хусусан, Хитойда фаолият юритувчи айрим ташкилотлар ҳам мазкур чекловлар рўйхатига киритилди.
Мазкур санкциялар Европа Иттифоқининг Россияга нисбатан босимни кучайтириш сиёсати доирасидаги энг янги қадами бўлиб, унинг стратегик савдо йўналишларини чеклаш ва молиявий оқимларни назоратга олишга қаратилган.
Каллас ЕИнинг бу қадами Украинадаги урушни тўхтатиш ва халқаро қонунларни бузганларга жавобгарлик юклаш йўлидаги муҳим босқич эканини таъкидлади.